انا رحت القناطر

بجد مصر لسه بخير ..لسه فيها اماكن حلوة كتير
من اسبوعين كده جت ياسمين وقالت: " ايه رأيكم لو نروح القناطر", بصراحة الفكرة عجبتني جدا خاصة اني عمري مارحت القناطر قبل كده !!
قلت وماله هيا بنا الى القناطر وطبعا الرحلة ماتبقاش رحلة من غير العيلة رحت انا وماما واتنين من خالاتى
عادي.. ايه يعني التذكرة بعشرة جنيه؟ مش مشكلة
هو احنا رايحين أي حته ديه برده القناطر
ايه يعني لما نكون عايزين نزور منطقه في بلدنا ونكون مجموعة وندفع 300جنيه ؟
عادي احنا برده بنشجع السياحة
المهم ركبنا المركب كان بجد تحفة, وكلنا اتفائلنا انا وياسمين وعيلتي واصحاب ياسمين كمان
اينعم عمو بتاع الباخرة كان بطئ جدا ورحنا في ساعتين ونصف بس وماله اهي رحلة في النيل
تووووووووووووووت توووووووووووووووووت
وصلنا القناطر
طبعا فرحنا كلنا وانا كنت زي الاطفال اول واحدة واقفة ع الباب علشان اشوف القناطر
نزلنا وياريتنا ما نزلنا
استقبلنا حنتور جميل جدا واللي كانت راكباه عاملتنا على اننا اجانب وماله اجانب اجانب
تركبي ياااهانم تركب يااابيه
اعتذرنلها بشياكة, وقلنا نكمل مش هاحكي على الريحة طبعا, ها تخيلوا انتوا
برده لسه بنتعامل على اننا اجانب, في ايه !! والله احنا مصرين
ماعلينا ناس بتعرض علينا حمير وناس بتعرض علينا احصنة وكأن القناطر ما فيهاش غير حميييييييييير وحصنة
ما علينا الجمعة آذنت قلنا ندخل نصلي علشان ربنا يباركلنا في اليوم, على العلم ان اخر مركب هتقوم من هناك يعني على الساعة 4ونص كده
ما علينا دخلنا نتوضى وبصراحة الخدمة هناك ولا دريم بارك
ما علينا صلينا هنعمل ايه دلوقت يااجماعة
هنروح نعد في الجنينة, يعني احنا سايبن مصر بكل جناينها ونروح نعد في القناطر, ماعلينا اكيد في دفرند في الموضوع
قاعدنا نمشي لمدة نص ساعة كده وعملوا فيها ناصحين وقالوا هنعد في الجانين اللى هناك العامة قلنا وماله عامة عامة احنا برده عددنا كبير
ودخلنا الجنينة العامة اللي مفروض هي مجانية وطلبوا منا نص جنيه, هنتكلم في نص جنيه مش مشكلة, بس بصراحة الجانين طلعت مافيش كده
مذهلة لا شجر ولا ضلة ولا حاجة خالص
"ابتسم انت في القناطر" كلمة كنا بنصبر بيها نفسنا
طبعا بعد معاناة اخترنا حته نعد فيها وقال جايه ياسمين وتقول تعالوا نلعب المنديل, منديل ايه هو احنا فينا حيل
المهم لعبنا شوية ورحنا نركب عجل
مهو مش ممكن نروح القناطر ومانركبش عجل هي القناطر تبقى قناطر من غير عجل ده اخر امل لينا فيكي ياااقناطر
رحنا نركب عجل, الله عليك يااعجل بجد جميلة يااقناطر
عادي ايه يعني ان العجل كان مهكع وملخلخ, الله هنتكلم في شكليات, ايه تلاتة منا طاروا من على العجل وانا كنت واحدة منهم ماهو برده تجديد
طوووووووول عمرنا بنركب عجل عمرنا طيرنا من عليه
ركبنا عجل واتبسطنا طبعا حتى بنطالونتا اتبسطت معانا من بقايا شحم العجل
ايه يعني اتنصب علينا هناك في العجل ..الله مالناس لبعضيها يعني اللي كان بيدفع خمسة كانت بتتحسب على انها 2 واللي يدفع عشرة كأنه دفع 7 والله كلها شكليات
المهم برده تووووووووووووووووووووووت توووووووووووووووووووت هنروح خلاص اليوم خلص المراكب جات وماله هنروح وماله
ياااااااااااااااااااااااااااااسمين:- ايه رائيكم ياااجماعة في الرحلة انا اخدت جنب
وقعدت اغني اغنية :-توبة ان رحت معاكي في حتة تاااااني توبة
وركبنا المركب واحنا كلنا سعادة وامل في السياحة الداخلية والخارجية وتحيا مصر ويعيش الريس
ويسامح يااسمين, ومع رحلة اخرى ويااسمين برضه, وانصح كل واحد عايز يزور معالم بلده مايروحش القناطر اللهم بلغت اللهم فاشهد واللي عايز يروح يبقى يتصل بياسمين وهي هتنظمهاله وبنصحكم لما ياسمين تعملكوا الرحلة لازم تخلوا خالتوا تعملكم معاها بيتزا لان بصراحة هي ديه الحاجة لوحيدة اللي صبرتني على اللي كنت فيها

ياااااااااسمين بصراحة البيتزا وحشتني مش هتعملي رحلة تاني