أشمعنى أم أحمد

أم أحمد دى يمكن تكون أمي وخالتك, ستي وستك, عمتي ومراة عمك, ليه أم أحمد وعشان إيه أم أحمد؟؟؟؟
لفت نظري النهاردة وأنا في الميكروباص لان البى إم بتاعتي البنزين خلص منها والمحفظة نسيتها فامخدش تاكسي ... عدي عدي المهم إني ركبت الميكروباص زى كل يوم لان الأتوبيس فاتني!! وكان ورايا اتنين ستات, ولاقيت واحده بتقول للى معاها يالا علشان المحطة جت يا أم أحمد 0
وكأني اول مرة اسمعها, لفتت نظري, أشمعنى دلوقتي ؟مانا طول عمري بسمعها
>> أمي أم أحمد... خالتي أم محمد...عمتي أم علي<< أول مرة أفكر بجد اشمعنى أم أحمد!! واحنا صغيرين نبهوا علينا اننا منقلش اسامي امهاتنا وكانه عار او عيب !! ماهي امي دي ليها اسم, والمصيبة أن الاسم ده ما بيفارقهاش حتى لما تتجوز, بالعكس... يعنى اول ما تكبر وتحلو ينادوها باسم اخوها كحالة مؤقتة, وبعد الجواز ينادوها باسم جوزها لحد اما يجي اسم النبي حارسه أحمد وينادوها بأم احمد ...!!! مشكلتنا اننا عايشين بفكر قبل الثورة, مايجراش حاجة لو قلت قبل التاريخ, طيب بنت الشاطى كانت بتكتب باسم بنت الشاطئ لأنها كانت في وقت يرفض تعليم المرأة, ما بيخرجهاش من البيت, يعني بمعنى اصح المرأة كانت مجرد انثى أو شبه انثى, تستنى العدل وتزغط في جوزها وينادوها بأم احمد, لكن دلوقتي فين أمي وأمك أم أحمد وأم مصطفى, ماهي في الشغل بتكتب اسمها كل ما بتمضي الصبح, وهي بتقبض, ولما بيطلب مديرها منها حاجه, يعني المدير لما بيطلب ورقة من سنية هيقولها مثلا هاتي الورقة يا أم احمد ولا ايه؟؟!! انا بتكلم عن امي وامك البسيطة, لكن فين السفيرة والوزيرة وحرم الرئيس, يعني لما بيجتمعوا او بيسفروا بيقولوا "قد عقدت اليوم أم جمال مؤتمر هام لحقوق المراة" ولا ايه !!! , ليه بنطلع واحنا فاقدين اسامينا ويقولولنا هي دى الاصول, والمفروض00 بتقولوا مساواة المرأة وهي لسه بينادوها بأم احمد !!! ,طيب بدل مايدوخوا علشان يسمونا باسامي بنات جميلة ويبحثوا عن اسم يليق مع اسم الاب طيب كانوا من الاول سامونا باسامي ولاد ولا ايه ؟!؟! يعني لوالست بتاعة المكيروباص كانت اعترفت باسم الست (ولا هو عيب ولاحرام ولا هو فتنة) وناديت الحلوة اللي معاها باسمها, مش كانت ريحتني وريحتكم منى, معلش بس انا هتكلم عن نفسي انا مروة مش هقبل اكون غير مروة مش هقبل اكون أم أحمد مش هشطب اسمي مش هنساه وهافضل طول عمري مروة ولو نادوني بام احمد مش هرد .. يمكن ساعتها هبقى ام هيثم

يا حلولى يا حلولى

النهاردة وانا عند خالتو, دينا بنتها كانت قاعدة على الكمبيوتر كعادتها 0000
وكانت بتقولي أعملك ((بلوج)) معايا يا مروة
قلتلها وماله يا دينا بس ياريت تذودي السكر,و لاقتيهم ضحكوا00
فبصراحة حسيت بإحراج فحاولت أصلح الموقف فقلتلها خلاص يا دينا هاتي معلقتين وتعالي ناكل
هي أم علي عندكم اسمها بلوج
ولاقتيهم بردوا بيضحكوا 00
ولاني نبيهة وسريعة الفهم فأنا عرفت طبعا أيه هو البلوج
أصل انا عائلتي ديه بتحب الفشخرة وقلت يبقى عمو حامد ((بابا دينا)) جايب لهم 2ك كاجو, بس بقى دينا بتمثل عليا ومسمياه ((بلوج ))
ولاقتيهم برده بيضحكوا بس المرة دي دينا اتخلت عن برودها المعتاد وعينك ما تشوف الا النور !!!!!
المهم فهمت ايه هو(( البلوج)) مايضرش بلوج بلوج, واهو بدل ما أكتب وما فيش يا عيني غير ماما وأحمد هما بس اللي يسمعوني أحب أنتوا كمان تسمعوني وطبعا هتسألوني بابا ما بيسمعنيش ليه
لأنه مؤمن إني موهوبة فا مبيحبش يضيع وقتوا معايا ههههههه ما علينا
المهم اني سعيدة جداا اني بقى عندي بلوج على الاقل هاكلمكم عليه
يااحلولي ياحلولي بقى عندي بلوج يااحلولي