ماتدخش في بالك شويه هرتله كده

عمرك حسيت ان اللي قدامك ده بيمثل عليك

كام مرة قلت لحد (ياعم ماتمثلش بس)ء
احيانا بحسد الحيونات لانهم بيقدروا يكتشفوا بعض لما بيمثلوا على بعض
يعني عندك مثلا الاسد لما بيشوف الفريسه بيمثل وبيحوم عليها علشان يقتنص الفرصه ويفترسها بس برضه في نفس الوقت الفريسه عارفه انه بيمثل عليها لان الاسد عمره ماهيكون بيتقرب من غزاله علشان يعمل معاها صداقة مثلا وهي مقتنعه بكده كويس وبتاخد حذرها كمان.
لكن احنا للاسف تهنا في بعض
مابقناش نعرف مين فينا الاسد ومين فينا الغزاله مين اللي بيمثل ومين اللي بيتفرج والمسرح فين؟
بنمثل في كل حاجه واي حاجه بنمثل في احساسنا ومشاعارنا وطبعا كلامنا
والناس بقى عندهم قدرة غريبه على التمثيل ماتقلش كلهم اتعلموا على ايد يوسف شاهين
وطبعا التمثيل دي كلمه شامله وعامه بتحمل اكتر من معنى من ضمن معانيها:_ لماحد يقلك ماتمثلش
يعني قصده ماتنافقنيش ماتكدبش عليا ماتخدعنيش وما تفتكرش اني هندي وطبعا بعتذر للهنود لان المثل خلاص مابقاش ينفع يطبق عليهم
دول هما اللي مفروض يقولوا لبعض انت فاكرني مصري
مش عارفه الناس اتغيرت كده ليه وعلشان ايه
السؤال دلوقتي ياترى الناس بتمثل ليه؟ ولا التمثيل بقى هاويه ولا مابقاش ينفع نعيش من غير تمثيل ولا ايه بالظبط.
بس في وسط كل دا في ناس صادقه ومابتعرفش تمثل اينعم صعب انك تقابلهم بس دا ماينمعش انهم فعلا موجودي ألحق بقى اتعرفلك على اتنين تلاته منهم قبل مايشتركوا في الفرقه...